Shoqata për të Drejtat e Pacientëve në Kosovë (PRAK) është shprehur e shqetësuar me vendimin e menaxhmentit të QKUK-së për zbatimin e tarifës prej 3 euro për përcjellësit e pacientëve.
Nga kjo shoqatë kanë thënë se “përcjellësi nuk është vizitor”, por shpesh është pjesë e domosdoshme e kujdesit ndaj pacientit, duke përfshirë sigurimin e barnave dhe analizave jashtë institucionit publik, ushqyerjen, higjienën, mobilizimin dhe mbështetjen emocionale, veçanërisht për fëmijët, pacientët e moshuar, kronikë ose ata me kufizime funksionale.
“Vendosja e një pagese për këtë rol krijon barrë shtesë për familjet, prek në mënyrë disproporcionale kategoritë e ndjeshme dhe rrezikon të penalizojë një mekanizëm mbështetës që vet sistemi e konsideron të nevojshëm”- thuhet në reagimin e PRAK.
Shoqata për të Drejtat e Pacientëve në Kosovë i ka bërë thirrje institucioneve që të heqin këtë tarifë për përcjellësit
Sipas Udhëzimit Administrativ NR.03/2024 për Bashkëpagesat për Shërbimet Shëndetësore, dita e qëndrimit në spital për personin shoqërues të pacientit më të vjetër se 15 vjeç (për tërë kohën e qëndrimit në spital), për çdo ditë është 3 euro.
QKUK në një përgjigje për Radio Evropën e Lirë kanë konfirmuar se zbatimi i kësaj pike ka nisur këtë muaj
