Së paku 45 persona janë vrarë, përfshirë gra e fëmijë, nga një sulm ajror izraelit në një kamp për palestinezë të zhvendosur në qytetin jugor të Gazës, Rafah, sipas Ministrisë së Shëndetësisë, që menaxhohet nga Hamasi.
Në video nga vendi i ngjarjes në zonën Tala l-Sultan të dielën në mbrëmje shihet një shpërthim i madh dhe një zjarr intensiv, raporton televizioni BBC.
Ushtria izraelite tha se kishte vrarë dy zyrtarë të lartë të Hamasit dhe se ishte duke i analizuar raportimet se janë lënduar civilët.
Disa orë më parë, Hamasi kishte hedhur tetë raketa nga Rafahu drejt Tel-Avivit, sulmet e para me rreze të gjatë ndaj qytetit qendror izraelit nga janari.
Incidentet erdhën dy ditë pasi Gjykata Ndërkombëtare e Drejtësisë e urdhëroi Izraelin që menjëherë ta ndalë ofensivën në Rafah, ku qindra mijëra njerëz ende besohet se janë duke u strehuar.
Gjysmëhëna e Kuqe Palestineze tha se në shënjestër të sulmit ajror të së dielës ishin tendat për persona të zhvendosur, afër një objekti të OKB-së në Tal al-Sultan, rreth dy kilometra në veriperëndim të qendrës së Rafahut.
Në pamje të rënda shihen disa struktura duke u djegur afër një mbishkrimi “Kampi Kuvajtian i Paqes 1”, si dhe ekipet e shpëtimit e kalimtarët e rastit duke bartur disa trupa.
“Po qëndronim ulur pranë derës së shtëpisë në mënyrë të sigurt. Papritmas e dëgjuam zhurmën e një rakete” – tha dëshmitari Fadi Dukhan.
“Vrapuam dhe e gjetëm rrugën të mbuluar me tym” – shtoi ai, duke thënë se bashkë me disa persona të tjerë panë një vajzë dhe një djalë të ri që ishin vrarë nga shpërthimi.
Presidenti i Francës, Emmanuel Macron, ka thënë se është i indinjuar nga sulmet izraelite në këtë kamp.
“I indinjuar nga sulmet izraelite që kanë vrarë shumë persona të zhvendosur në Rafah. Këto operacione duhet të ndalen. Nuk ka zona të sigurta në Rafah për civilët palestinezë” – shkroi presidenti francez në rrjetin X, raporton gazeta “The Guardian”.
“Unë bëj thirrje për respektim të plotë të së drejtës ndërkombëtare dhe për një armëpushim të plotë” – shtoi ai.
