Dr. Alaa al-Najjar la dhjetë fëmijët e saj në shtëpi dhe shkoi për të punuar në emergjencën e Kompleksit Mjekësor Nasser në Rripin jugor të Gazës.
Disa orë më vonë, trupat e shtatë fëmijëve – shumica prej tyre të djegur rëndë – mbërritën në të njëjtin spital.
Ata ishin fëmijët e saj, të vrarë në një sulm ajror izraelit që kishte shënjestuar shtëpinë e tyre.
Bëhet e ditur se fëmija më i madh ishte 12 vjeç, më i vogli vetëm tre.
Ndërsa trupat e dy fëmijëve të tjerë – një foshnje shtatë muajshe dhe një dy vjeçare – mbeten ende të varrosur nën rrënoja.
Vetëm një fëmijë mbijetoi dhe ai u plagos rëndë, shkruan CNN.
I plagosur rëndë ka mbetur edhe bashkëshorti i mjekes, gjithashtu mjek.
Munir al-Barsh, drejtori i përgjithshëm i Ministrisë së Shëndetësisë në Gaza, tha se burri i Dr. Najjar sapo ishte kthyer në shtëpi kur vendi u sulmua.
“Nëntë nga fëmijët e tyre u vranë: Jahja, Rakan, Raslan, Gebran, Eva, Rival, Sayden, Luqman dhe Sidra”, tha al-Barsh duke shtuar se bashkëshorti i saj është në terapi intensive.
“Ky është realiteti me të cilin punonjësit tanë të kujdesit shëndetësor në Gaza përballen çdo ditë. Fjalët nuk mund ta përshkruajnë dhimbjen. Në Gaza, nuk janë vetëm punonjësit e kujdesit shëndetësor ata që janë në shënjestër – agresioni izraelit po zhduk familje të tëra”, tha drejtori.
Raportohet se Najjar vazhdoi të punonte edhe pasi humbi fëmijët e saj, duke kontrolluar herë pas here burrin e saj dhe fëmijën e vetëm të mbijetuar, Adamin 11-vjeçar.
Babai dhe djali i janë nënshtruar dy operacioneve dhe ende po marrin trajtim.
