Përmes një postimii në faqen e tij në Facebook, Kryetari i Komunës së Prishtinës, Përparim Rama ka njoftuar se Bordi i Drejtorëve të KRM “PASTRIMI” ka shkarkuar nga pozita e Kryeshefit Ekzekutiv Burim Kelmendin.
Sipas njoftimi thuhet se arsyet e shkarkimit të tij kanë të bëjnë me mosrealizimin e objektivave për rritjen e kapitalit të kompanisë, devijimet ekstreme nga parashikimet e Planit të Biznesit si dhe punësimet e paarsyeshme.
Postimi i plotë i Kryetarit të Komunës së Prishtinës, Përparim Rama
Në mbledhjen e jashtëzakonshme, Bordi i Drejtorëve të KRM “PASTRIMI”, ka konstatuar se Kryeshefi Ekzekutiv nuk ka realizuar objektivat për rritjen e kapitalit të kompanisë, si objektiv bazë i përcaktuar me Plan Biznesin e aprovuar, dhe krejt kjo për shkak të keqmenaxhimit.
Është vërtetuar se ka pasur devijime ekstreme nga parashikimet e Planit të Biznesit, ka pasur mbipunësim të paarsyeshëm dhe në kundërshtim me fuqinë ekonomike të kompanisë, si dhe është praktikuar edhe nepotizëm.
Kjo është konstatuar edhe në gjetjet e Zyres së Auditorit të jashtëm, e cila ka gjetur shumë shkelje të rënda për kompaninë, si pasojë e marrjes së vendimeve përtej kompetencave të Kryeshefit Ekzekutiv, pa aprovim nga Bordi i Drejtorëve.
Vendimi për shkarkimin nga pozita e Kryeshefit Ekzekutiv, z. Burim Kelmendit, hyn në fuqi sot, me datë 08.07.2022.
