Zyra e Bashkimit Evropian në Kosovë ka bërë të ditur se gjatë takimit të zhvilluar me Këshillin Prokurorial të Kosovës (KPK), ka kërkuar nga të gjithë anëtarët që të zbatojnë plotësisht dhe në mënyrë të përbashkët reformat në këtë institucion.
Në njoftimin e BE-së theksohet se sundimi i ligjit mbetet parakusht themelor për integrimin evropian.
“Zyra e BE-së në Kosovë u bëri sot thirrje të gjithë anëtarëve të KPK-së që të zbatojnë plotësisht dhe së bashku reformën e Këshillit, të sigurojnë ligjshmërinë e vendimeve të tyre, të veprojnë me integritet dhe të ruajnë besimin e publikut në sistemin e drejtësisë”, thuhet në njoftim.
Kjo thirrje vjen pas tensioneve të fundit brenda KPK-së dhe shkarkimit të ushtruesit të detyrës së kryeprokurorit të shtetit, Besim Kelmendi. Për këto zhvillime, Zyra e BE-së kishte kërkuar një takim urgjent me anëtarët e Këshillit.
Ndërkohë, tri organizata të shoqërisë civile kanë paralajmëruar se situata e krijuar ka rritur rrezikun për vendimmarrje të kundërligjshme brenda KPK-së, duke bërë thirrje për ndërhyrje të gjykatës me qëllim garantimin e ligjshmërisë
