SHBA-ja ka kërkuar nga Maqedonia e Veriut që të pranojë propozimin francez në mënyrë që të hapë negociata me BE-në për integrimin. Duke i drejtuar një letër të hapur popullit maqedonas, i cili prej ditësh po proteston kundër propozimit francez, ambasadorja e SHBA-së në Shkup, Kate Marie Byrnes, thotë se propozimi është një moment historik, mund të mos jetë i përsosur, por është i domosdoshëm për të hedhur hapin e parë. Ajo shton se në tryezën e negociatave pala maqedonase mund të bëjë propozimet në interes të popullit të saj, por fillimisht duhet të pranojë propozimin.
Sipas ambasadores së SHBA-së propozimi francez mbron interesat thelbësore të Maqedonisë së Veriut dhe njeh gjuhën dhe identitetin maqedonas
SHBA thekson e është e domosdoshme që të nisni negociatat në mënyrë që Maqedonia e Veriut të bëhet pjesë e BE për të zhvillua ekonominë dhe demokracinë.
Letra e ambasadores amerikane vjen në kuadër të thirrjeve të ndërkombëtarëve për të pranuar propozimin francez që do të heq veton e Bullgarisë për hapjen e negociatave. Pranimi i këtij propozimi nga ana e Shkupit do të sjellë edhe dritën jeshile për Shqipërinë.
Letra e plotë e ambasadores së SHBA-së në Shkup
Vendi juaj ka arritur një moment historik në rrugëtimin e tij të gjatë dhe sfidues drejt të ardhmes Euro-Atlantike. Gjatë këtij rrugëtimi, rruga juaj ka pasur pjesën e vet të pengesave dhe vonesave, dhe ju jeni përballur me sfida për gjuhën dhe identitetin maqedonas, të cilat janë pjesë thelbësore e asaj se kush jeni ju si komb. Keni marrë vendime të vështira me pritshmëri për përparim dhe tani duhet të merrni një tjetër.
Megjithatë, është për shkak të sfidave me të cilat jeni përballur dhe ato me të cilat mund të përballeni në të ardhmen që Shtetet e Bashkuara po ju inkurajojnë të ecni përpara me propozimin aktual të BE për anëtarësim. Ju nuk keni nevojë të përkujtoheni se disa qeveri dhe publiku në përgjithësi kanë punuar drejt anëtarësimit në BE për dy dekada. Si një aleat, partner dhe mik, ne kemi një interes të veçantë për të siguruar të ardhmen tuaj Euro-Atlantike.
Ne kemi ecur së bashku rrugën që nga viti 2004, duke zbatuar programe dhe duke ofruar ndihmë që synojnë t’ju ndihmojnë të realizoni aspiratat tuaja për NATO dhe BE. Ju keni arritur të parën. Tani duam t’ju shohim të siguroni përfitimet që vijnë nga një proces aktiv i anëtarësimit dhe të drejtat për të qenë një shtet anëtar i BE-së. Anëtarësimi në BE do ta bëjë vendin tuaj më të fortë. Anëtarësimi në një organizatë ndërkombëtare, aq më pak pjesëmarrja në ato procese, është punë e vështirë dhe vjen me vendime të vështira.
Ju tashmë e dini këtë; ju i keni bërë ato. Por pranimi i këtij propozimi do të thotë që më në fund do të keni një vend në tryezën e negociatave të anëtarësimit. I vendos vendet anëtare të BE-së, shumë prej të cilëve janë partnerët dhe aleatët tuaj të ngushtë, në dhomë me ju. Komisioni Evropian do të presë ekipet tuaja në Bruksel dhe do t’i dërgojë ekspertët e tyre të kalojnë kohë këtu në terren, duke kryer procesin e shqyrtimit dhe duke dëshmuar vetë për shoqërinë vibrante demokratike që ekziston këtu.
Pasi të filloni negociatat, do të keni më shumë mjete dhe falë metodologjisë së re, qasje më të hershme në fondet dhe programet e BE-së – të cilat mund t’i përdorni për të realizuar qëllimet tuaja dhe për të ndërtuar të ardhmen që dëshironi për veten dhe fëmijët tuaj. Dhe sapo të anëtarësoheni në BE, do të keni një zë të barabartë brenda Unionit, ashtu siç keni në NATO.
Çështjet që përmban propozimi janë teknike dhe ju janë paraqitur pa shumë kohë për debat publik. Ne e kuptojmë se nuk është ajo që do të kishit hartuar nëse do të kishit qenë në gjendje të diktoni termat në mënyrë të njëanshme—por ajo njeh gjuhën dhe identitetin maqedonas dhe i mbron ato nga sfidat e mëtejshme. Megjithëse mund të mos jetë i përsosur, propozimi bën atë që është e domosdoshme: mbron interesat tuaja thelbësore dhe nis negociatat dhe procesin dinamik të shqyrtimit.
Në këndvështrimin tonë pragmatik, ai përfaqëson realisht mundësinë më të mirë për ta çuar më në fund vendin tuaj përpara në rrugën e tij drejt BE-së, duke forcuar kontrollin mbi të ardhmen tuaj. Zgjedhja për të ecur përpara është vendimi juaj si një komb sovran – dhe ne e dimë se është një zgjedhje e vështirë. Por do të vazhdojë të jetë vendimi juaj gjatë gjithë procesit të anëtarësimit. Në tryezën e bisedimeve, nëse mendoni se shqetësimet tuaja nuk po trajtohen, mund të bëni zgjedhje të tjera. Ju duhet të bëni hapin e parë për të arritur në të dytin.
Thelbi i demokracisë është liria për të zgjedhur. Thelbi i miqësisë është të mbështesim zgjedhjet që bëjnë miqtë tanë dhe të bëjmë thirrje për guxim në kohë sfiduese. Si miku juaj, Shtetet e Bashkuara shpresojnë që ju të zgjidhni atë që është më e mira për vendin tuaj për sot, por edhe për të ardhmen.
