Një senator amerikan ka bërë thirrje për hetim qeveritar mbi ndikimin në sigurinë kombëtare e hudhrave të importuara nga Kina.
Senatori republikan Rick Scott ka pretenduar se hudhra kineze është e pasigurt, duke cituar metoda josanitare të prodhimit.
Kina është eksportuesi më i madh në botë i hudhrave dhe SHBA-ja është konsumator i madh, raportoi BBC.
Por, tregtia ka qenë proces kontrovers për vite.
SHBA-ja e ka akuzuar Kinën për shitje të hudhrës me çmime nën ato që janë në treg.
Që nga mesi i viteve 1990, ajo ka vendosur tarifa ose taksa të rënda për importet kineze, në mënyrë që të parandalojë që prodhuesit amerikanë të dalin nga tregu.
Por në vitin 2019, administrata Trump i ka rritur këto tarifa.
Senatori Scott iu ka referuar këtyre shqetësimeve por ai ka shtuar edhe shqetësimet për shëndetin publik duke përmendur kualitetin dhe sigurinë e produktit.
Ai ka përmendur praktika që thotë se janë të dokumentuara nëpër video në internet, që përfshijnë edhe rritjen e hudhrave në ujëra të zeza.
Ai i ka bërë thirrje Departamentit të Tregtisë që të veprojë, sipas ligjit që lejon hetimet mbi ndikimin e një importi specifik kur është në pyetje siguria në SHBA.
