Sekretari amerikan i Shtetit, Antony Blinken, e ka uruar Kosovën në 16-vjetorin e Pavarësisë.
Blinken ka thënë se SHBA-ja e vlerëson partneritetin e qëndrueshëm dhe miqësinë mes njerëzve. Ai ka përsëritur mesazhin e presidentit Joe Biden për Kosovën që dha një ditë më parë.
“Ndërsa vazhdoni të bëni përparim në forcimin e institucioneve demokratike dhe promovimin e sundimit të ligjit, ne do të vazhdojmë të mbështesim një Kosovë multietnike që avancon një rajon më të sigurt dhe më të begatë. Shtetet e Bashkuara inkurajojnë Kosovën që të zbatojë zotimet e saj dhe të ecë përpara përmes dialogut të lehtësuar nga BE-ja për të arritur një marrëveshje gjithëpërfshirëse të normalizimit me Serbinë, në rrugën drejt njohjes së ndërsjellë në fund”, ka shkruar Blinken në urim.
Blinken ka theksuar tutje se SHBA-ja beson në të ardhmen e Kosovës në institucionet euroatlantike.
Ndërsa, ka shtuar se mbështet aspiratat e përcaktuara sipas Deklaratës së Pavarësisë dhe Kushtetutës për të “kontribuuar në stabilitetin e rajonit dhe Evropës duke krijuar marrëdhënie të mira fqinjësore”.
“Urime mikut, partnerit dhe aleatit tonë përvjetorin e Pavarësisë”, thuhet në fund.
