Kancelari Olag Scholz tha se Qeveria gjermane e ka vendosur në prioritet ndihmën për shtetet e Ballkanit Perëndimor që të përafrohen me Bashkimin Evropian dhe sipas tij kjo do të bëhet përmes Procesit të Berlinit, që është nisur më 2014.
Kështu ka deklaruar Scholz të premten gjatë konferencës së përbashkët për media me kryeministrin e Kosovës, Albin Kurti.
Scholz theksoi se do të rijetësojë Procesin e Berlinit brenda vitit të ardhshëm.
“Dëshiroj që së bashku me partnerët tanë, në kuadër të Procesit të Berlinit ta rijetësoj atë këtë vit dhe në vjeshtë do të thërras një konferencë në Berlin. Rajoni duhet të përparojë referuar krijimit të një tregu të përbashkët rajonal dhe katër marrëveshjet e rëndësishme për lëvizjen e lirë, të njerëzve, për njohjen e diplomave profesionale duhet të lidhen shpejt”, është shprehur ai.
Procesi i Berlinit është një nismë e iniciuar nga ish-kancelarja gjermane Angela Merkel për të lehtësuar bashkëpunimin mes vendeve të Ballkanit Perëndimor tre prej të cilave tashmë janë bërë pjesë iniciativës “Open Balkan”, përkatësisht Shqipëria, Serbia dhe Maqedonia e Veriut./Kosovanews/
