Samiti i NATO-s në Madrid është drejt fundit sot me vendime për transformimin dhe forcimin e Aleancës.
“Vendimet që kemi marrë në Madrid do të sigurojnë që Aleanca jonë të vazhdojë të ruajë paqen, të parandalojë konfliktet dhe të mbrojë popujt tanë dhe vlerat tona. “Evropa dhe Amerika e Veriut janë bashkë në NATO”, tha sekretari i përgjithshëm i NATO-s, Jens Stoltenberg.
Udhëheqësit e NATO-s ranë dakord për ndryshime thelbësore në parandalimin dhe mbrojtjen e NATO-s, së bashku me forcimin e mbrojtjes së avancuar, forcimin e grupeve luftarake në pjesën lindore të Aleancës dhe rritjen e numrit të forcave të gatishmërisë së lartë në mbi 300.000.
Udhëheqësit ranë dakord gjithashtu të investojnë më shumë në aleancën ushtarake dhe të rrisin bashkëfinancimin.
Gjatë samitit, partnerët më të afërt të NATO-s, Finlanda dhe Suedia u ftuan të bashkohen me Aleancën, e cila është një nxitje e rëndësishme për sigurinë euro-atlantike.
Aleatët ranë dakord të ofrojnë mbështetje afatgjatë për Ukrainën përmes një pakete të forcuar gjithëpërfshirëse ndihme.
Udhëheqësit mbështetën konceptin e ri strategjik të NATO-s në një botë më të rrezikshme dhe konkurruese, e cila përcakton qasjen e NATO-s ndaj Rusisë dhe kërcënimeve të tjera, duke përfshirë terrorizmin, sulmet kibernetike dhe hibride.
Për herë të parë, koncepti strategjik trajton sfidat e paraqitura nga Kina dhe udhëheqësit ranë dakord gjithashtu për hapat për të luftuar ndryshimet klimatike, duke përfshirë objektivat për reduktimin e emetimeve të gazeve serrë dhe lëvizjen drejt emetimeve zero deri në vitin 2050.
Një Fond i ri Inovacioni i NATO-s u lansua gjithashtu në Samit për të ndihmuar Aleancën të “mprehë” avantazhin e saj teknologjik.
Aleatët gjithashtu u angazhuan për luftën kundër terrorizmit dhe përgjigjen e NATO-s ndaj kërcënimeve dhe sfidave nga Lindja e Mesme, Afrika e Veriut dhe Sahel.
“Ne po përballemi me situatën më të rëndë të sigurisë në dekadat e fundit. Por sfidën po e përballojmë me unitet dhe vendosmëri”, tha sekretari i Përgjithshëm i NATO-s në konferencën e fundit për shtyp.
Samiti i NATO-së vitin e ardhshëm do të mbahet në Vilnius të Lituanisë./kp/
