Zëvendësministri i Drejtësisë, Blerim Sallahu ka komentuar për miratimin e ndryshimeve në Projektligjin për Byron Shtetërore për Verifikimin dhe Konfiskimin e Pasurisë së Pajustifikueshme, duke thënë se Konfiskimi i pasurisë së pajustifikueshme nuk ka alternativë.
Sallahu mes tjerash tha se veçantia e këtij projektligji lidhet me faktin e nevojës për analiza shkencore e teorike që e kanë karakterizuar tërë procesin e hartimit të Projektligjit, dhjetëra nene të të cilit janë produkt i mendimeve dhe interpretimeve të thella për shkak të autenticitetit të tij.
Ai shprehet i lumtur për tërë angazhimin dhe pjesëmarrjen në ideimin dhe përpilimin me punë të pareshtur me Kabinetin, pjesëtarë të sistemit të drejtësisë dhe ekspertë ndërkombëtarë.
Tutje zëvendësministri shtoi se është e hapur mundësia për miratimin e Byrosë, e që sipas tij do t’i eliminojë padrejtësitë e ndodhura shoqërore sa i përket keqpërdorimit të pasurive publike në vitet e pasluftës dhe është i bindur se Byroja do të jetë efikase dhe funksionale, sipas planifikimeve për ligjshmëri dhe drejtësi.
