Sali Zyba, nga Lëvizja Vetëvendosje, ka reaguar pas shkarkimit të Besim Kelmendit nga pozita e ushtruesit të detyrës së Kryeprokurorit të Shtetit, vendim i marrë sot nga Këshilli Prokurorial i Kosovës.
Në një postim në Facebook, Zyba ka pretenduar se shkarkimi i Kelmendit ka ardhur si rezultat i asaj që ai e quan “fushatë mediatike”, duke e lidhur këtë me gazetarin Vehbi Kajtazi. Duke iu referuar deklarimeve të Kelmendit në konferencën e djeshme për media, Zyba ka shkruar se kryeprokurori i kishte thënë se Kajtazi kishte shkuar në zyrën e tij “në rolin e sekserit për raste gjyqësore në dobi të disa bizneseve”, dhe se pas refuzimit, “i ka dërguar mesazhe shantazuese”, të cilat Kelmendi i kishte denoncuar.
Zyba thotë se pas këtyre ngjarjeve “dje nisi një fushatë mediatike kundër tij”, ndërsa sot ndodhi shkarkimi i Kelmendit.
“Një skemë shumë e dobët, por që mbi të gjitha transparente: Vehbi Kajtazi, me titull gazetar, por me funksion si sekserë i bizneseve, shantazhues i prokurorit të shtetit dhe instrument i grupeve të interesave. Me gjasë AGK do t’i del në mbrojtje pas këtij statusi”, ka thënë Zyba.
