Presidentja e Greqisë, Katerina Sakellaropoulou, zhvillon vizitë zyrtare në Serbi nga data 27 deri më 29 mars. Ajo do të pritet nga presidenti i këtij vendi, Aleksandar Vuçiq. Por para kësaj vizite, Sakellaropoulou ka dhënë një intervistë për mediat serbe.
Mes tjerash, presidentja greke është pyetur edhe për qëndrimin e shtetit të saj në raport me njohjen e pavarësisë së Kosovës.
Sipas saj, Greqia nuk e ka njohur pavarësinë e Kosovës, dhe se një qëndrim i tillë mbetet i njëjtë.
“Në të njëjtën kohë, Greqia, përveç qëndrimit të saj të njohur për statusin e Kosovës dhe besnike ndaj politikës së saj në Ballkanin Perëndimor, ndjek një qasje pragmatike dhe konstruktive në raport me Kosovën, e cila synon forcimin e stabilitetit si dhe një lëvizje të përgjithshme drejt integrimit në BE të të gjithë rajonit, që është qëllimi ynë strategjik”, tha ajo.
“Integrimi i rajonit të Ballkanit Perëndimor në BE është një investim i dobishëm i natyrës strategjike, si për vendet anëtare të BE-së, ashtu edhe për partnerët e Ballkanit Perëndimor”.
Sakellaropoulou u shpreh se pozicionin e saj, Greqia e ka mbrojtur dhe promovuar vazhdimisht për dekada.
“BE-ja nuk është e plotë pa Ballkanin Perëndimor”, tha Sakellaropoulou.
Greqia është një nga pesë vendet e BE-së që nuk njeh pavarësinë e Kosovës, së bashku edhe me Qipron, Sllovakinë, Spanjën e Rumaninë.
Megjithatë, qëndrimi i saj në raport me Kosovën është shumë miqësor dhe Athina e Prishtina zyrtare, kanë marrëdhënie shumë të mira.
