Rektori i Universitetit të Prishtinës “Hasan Prishtina”, Naser Sahiti ka thënë nëse ky institucion dëshiron që të bëhet serioz e të jetë shembull, duhet që të eliminohen nga aty plagjiatorët.
Organizata për Rritjen e Cilësisë në Arsim (ORCA) ka vizituar të premten Rektoratin e Universitetin e Prishtinës “Hasan Prishtina”. Rron Gjinovci nga kjo organizatë ka thënë me këtë rast se ata renditen krah atyre që janë kundër plagjiaturës, siç është edhe rektori i UP-së, Naser Sahiti.
“Pra sot është dita kur ndahen ata që janë kundër plagjiaturës dhe ata që janë pro plagjiaturës. Ne si ORCA poashtu kemi ardhur me u renditë me këta që janë kundër plagjiaturës e ata tjerët janë pro plagjiaturës. Kjo domethënë që ata mund të fitojnë këtë betejë sot që me shkarku rektorin dhe menaxhmentin por luftën unë po ju garantoj që kemi me fitu ne”, ka thënë Gjinovci.
Ai ka shtuar se Universiteti i Prishtinës është vija e kuqe për cilindo pushtet dhe Qeveri.
“Pra vija e kuqe e shoqërisë civile dhe qytetarëve të Kosovës është Universiteti i Prishtinës për cfarëdo pushteti dhe për secilën Qeveri. Kjo i bjen që ne kemi me vazhdu luftën. Për mu nuk ka fare rëndësi kush është ministër dhe kryeministër, për mu ka shumë rëndësi se çfarë kualiteti ka UP-ja”, është shprehur Gjinovci.
Ndërkaq, rektori Sahiti ka thënë se kanceri i një universiteti është palgjiatura.
“ Për opinionin dhe anëtarët e Këshillit Drejtues, definitivisht nëse mendojnë që nëse nuk marrin veprime eventualisht unë do të korrigjohem nga ky kusht që e kam aktualisht për me luftu këtë dukuri, atëherë ajo nuk është arsyeja dhe lirisht le të shkojnë më tutje, se unë nuk kam mundësi të ndryshojë formën e qeverisjes në kuptimin e adresimin e këtyre të gjeturave, të themi kanceri i çdo universiteti është çështja e plagjiaturës. Nuk ka qenë e adresuar asnjëherë. Dhe nëse Universiteti i Prishtinës do me të bëhet përfundimisht ashtu qysh i ka hije Kosovës është e domosdoshme që kjo dukuri të adresohet në mënyrë sistematike, edhe me u eleminu nuk mundet në tërësi por me u zvogëlu në minimumin e mundshëm. Prandaj kjo që ka filluar tash është vetëm fillimi”, është shprehur Sahiti.
Rektori Sahiti ka mbajtur të enjten një konferencë për media duke thënë se në mbledhjen e Këshillit Drejtues të UP-së që do të mbahet të premten, pritet të bëhet shkarkimi i tij.
Sahiti ka thënë se ky Këshill lë shumë për të dëshiruar.
Inicimin e shkarkimit të Sahitit nga Këshilli Drejtues i UP-së e kanë kundërshtuar ashpër 19 organizata të shoqërisë civile.
