Sekretari i Përgjithshëm i NATO-s ka vizituar Zagrebin në një moment të ndjeshëm për Aleancën. Një vend anëtar flet hapur se dëshiron territorin autonom të një vendi tjetër anëtar. Por Rutte thotë se NATO nuk është në krizë, pavarësisht deklaratave të presidentit amerikan për Grenlandën.
“Së bashku si Aleancë, dhe veçanërisht shtatë vendet që kufizohen me rajonin e Arktikut, theksojmë se mbrojtja kolektive është kyçe. Të gjithë shohim ndryshimet klimatike dhe hapjen e rrugëve detare. Prandaj duhet të sigurohemi që të bëjmë gjithçka për të mbrojtur Arktikun. Shqetësimi im i vetëm është si të mbetemi të sigurt përballë rusëve dhe mendoj se po ecim në drejtimin e duhur, tha Rutte.
“Ne respektojmë faktin që Grenlanda është pjesë e Danimarkës, edhe pse nuk është në Bashkimin Evropian, por është e qartë se ajo bie nën juridiksionin e saj. Prandaj, sipas mendimit tonë, një dialog cilësor mund ta zgjidhë një situatë të tillë në dobi të të gjithëve”, tha kryeministri i Kroacisë, Andrej Pllenkoviq.
NATO po balancon mes dëshirës së Trumpit për Grenlandën dhe përpjekjeve për arritjen e një armëpushimi në Ukrainë. Sipas planit të paqes me 20 pika, Kievi do të merrte garanci të ngjashme me nenin 5 të NATO-s, por jo anëtarësim. Të paktën për momentin.
“Një vit e gjysmë më parë, Aleanca mori një vendim politik që ende vlen. Ukraina është në një rrugë të pakthyeshme drejt NATO-s. Disa janë kundër ose skeptikë, si Hungaria. Koalicioni i vullnetarëve dëshiron të sigurojë që Rusia, pas një marrëveshjeje paqeje, të mos sulmojë më kurrë. Nëse Ukraina nuk do të jetë në NATO, atëherë çfarë? Ky debat po zhvillohet pikërisht tani, shtoi Rutte, raporton HRT.
