Zëdhënësja e Ministrisë së Punëve të Jashtme të Rusisë, Maria Zakharova tha se janë të gatshëm të sigurojnë daljen e drithit ukrainas me anije të huaja.
Në një konferencë javore për media në Moskë, Zakharova tha se nga forcat ruse janë formuar kushtet e nevojshme për funksionimin e sigurt të korridoreve humanitare në Detin e Zi dhe Azov. Zakharova theksoi se për eksportimin e produkteve bujqësore mund të përdoren portet Mariupol dhe Berdyansk.
“Konfirmojmë se jemi gati të sigurojmë daljen e drithit ukrainas me anije të huaja. Kjo mund të realizohet me kushtin që anijet të kontrollohen për trafikimin e armëve dhe Kievi të heqë dorë nga veprimet nxitëse në Detin e Zi, kërcënimi me mina dhe shkaktimin e tensioneve. Konfirmojmë edhe njëherë se jemi të gatshëm të zbatojmë përgjegjësitë tona për eksportimin e drithit, plehut, energjisë dhe produkteve të tjera kritike”, deklaroi Zakharova.
“Pavarësisht sanksioneve, vazhdojmë eksportin e ushqimeve përmes kanaleve dypalëshe”, potencoi Zakharova duke thënë se deri në fund të vitit mund të furnizojnë tregjet ndërkombëtare me rreth 25 milionë tonë drithë dhe 22 milionë tonë pleh.
Pasi vuri në dukje se deklaratat që veprimet e Rusisë në Ukrainë provokojnë krizën ushqimore dhe të drithit, janë bërë nga përfaqësues të vendeve perëndimore dhe organizatave ndërkombëtare përfshirë OKB-në, Zakharova mbrojti idenë se kjo është “gënjeshtër”.
