Sekretari amerikan i Shtetit, Marco Rubio, ka thënë të hënën se administrata Trump ka përfunduar spastrimin e saj gjashtë-javor të programeve të Agjencisë gjashtë dekadëshe të SHBA-së për Zhvillim Ndërkombëtar (USAID).
Në një postim të rrallë në X ai ka njoftuar 18% e programeve të ndihmës dhe zhvillimit që kanë mbijetuar do të zhvendosen nën Departamentin e Shtetit, raporton AP.
Rubio në postim ka falënderuar Departamentin për Efiçencë qeveritare, i njohur shkurt si DOGE, të udhëhequr nga Elon Musk, dhe po ashtu stafin e administratës Trump, duke thënë se ata kanë punuar me orë të tëra “për të arritur këtë reformë të vonuar dhe historike” në ndihmën e huaj.
Presidenti Donald Trump më 20 janar ka lëshuar një urdhër ekzekutiv për ngrirje të financimit të ndihmës së huaj dhe një rishikim të dhjetëra miliarda dollarëve të ndihmës dhe zhvillimit të SHBA-së jashtë vendit. Trump ka thënë se pjesa më e madhe e ndihmës së huaj ishte e kotë.
Rubio ka thënë në postimin e tij se rishikimi po “mbaronte zyrtarisht”, me rreth 5,200 nga 6,200 programet e USAID-it të eliminuara.
“Ato programe shpenzuan dhjetëra miliarda dollarë në mënyra që nuk u shërbenin, (dhe në disa raste edhe dëmtonin), interesave thelbësore kombëtare të Shteteve të Bashkuara”, ka shkruar Rubio.
“Në konsultim me Kongresin, ne synojmë që 18% e mbetur e programeve që po mbajmë … të administrohen në mënyrë më efektive nën Departamentin e Shtetit”, ka shtuar ai.
Ligjvënësit demokratë dhe të tjerë e quajnë të paligjshme mbylljen e programeve të financuara nga Kongresi, duke thënë se një veprim i tillë kërkon miratimin e Kongresit.
