Ministrja e Ekonomisë, Artane Rizvanolli, ka thënë të martën në Kuvend se këtë vit ka ulje të konsumit të energjisë elektrike për gjashtë për qind, krahasuar me një vit më parë.
Rizvanolli ka thënë gjatë seancës së jashtëzakonshme për shqyrtimin e Vendimit të Qeverisë së Republikës së Kosovës nr.03/103, datë 28.10.2022 për zgjatjen e masave emergjente në furnizimin e energjisë, se nëse vazhdon rënia e konsumit, kriza e energjisë do të tejkalohet më lehtë.
“Krahasuar me vitin e kaluar kemi ulje të konsumit të energjisë elektrike mbi 6% gjatë periudhës janar-shtator 2022, që është një trend pozitiv i cili nëse vazhdon do të na ndihmojë në kalimin më të lehtë të krizës energjetike”, është shprehur Rizvanolli.
Sipas saj, aktualisht dy blloqe janë në remont dhe se situata do të vazhdojë të mbetet e ndjeshme ndaj krizës energjetike në Evropë.
