Sipas rezultateve të publikuruara nga Qendra së Numërimit dhe Rezultateve, deri më tash nga 2 mijë e 557 vendvotime, janë rinumëruar 1 mijë e 887, apo 73.80 për qind, duke bërë që procesi i rinumërimit të përmbyllet në 25 komuna.
KQZ-ja planifikon që deri në fund të këtij muaji të përfundojë procesin e rinumërimit në mënyrë që t’i hapet rrugë shpalljes së rezultateve përfundimtare të zgjedhjeve të 28 dhjetorit të vitit të shkuar, çka planifikon që ta bëjnë në fillim të shkurtit.
Komisioni Qendror i Zgjedhjeve vendosi që në rinumërim të shkojnë të gjitha vendvotimet në nivel vendi pasi u evidentuan manipulime me vota të kandidatëve.
Nën dyshimet për këtë vepër penale sot i është caktuar masa e paraburgimit 23 personave që ishin në mesin e 109 të ndaluarve në Prizren, pas aksionit të Prokurorisë Themelore atje, lidhur me dyshimet për falsifikim rezultatesh.
Prokuroria e Shtetit ka kërkuar mbledhje informatash e provash nga Prokuroritë Themelore në mbarë vendin për të parë nëse ka elemente të kryerjes së kësaj vepre penale e sanksionuar me Kodin Penal të Kosovës.
Para daljes në pah të problemeve me manipulimin e votave për kandidatë, KQZ-ja pati paraparë 19 janarin për shpallje të rezultateve përfundimtare.
