Me krahët e shtrirë si të një shpendi, Evald Krnic u zhyt më shumë se 20 metra nga një urë në lumin e ftohtë të Drinit të Bardhë, shkruan Reuters.
“Nuk është vetëm kërcim, por edhe fluturim”, deklaroi ai pasi fitoi në garën e zhytjes në ujë në Urën e Fshejt, një ngjarje vjetore e mbajtur për 73 vitet e fundit dhe duke bërë bashkë profesionistë e amatorë të zhytjes.
“Emocioni kryesor është të jesh gjallë. Nëse nuk ke frikë, nuk mund të kërcesh, pasi nuk ka adrenalinë dhe mund të përfundosh duke bërë gabime që mund të çojnë në lëndime. Bukuria e këtij sporti qëndron në mposhtjen e kësaj frike dhe në hapat që merr”, u shpreh Krnic.
Krnic ishte gjithashtu fitues vitin e kaluar në qytetin boshnjak Mostar, ku ai u hodh 22 metra nga një urë e vjetër në lumë poshtë.
“Gjëja më e madhe është kur del jashtë ujit dhe nuk je i lënduar”, tha Florid Gashi, i cili ka fituar çmimin e parë në vitet e kaluara. Ai shtoi se frika e bën sportin kaq emocionues.
