Parregullsitë e evidentuara në procesin e zgjedhjeve parlamentare të mëhershme kanë treguar për domosdoshmërinë dhe nevojën e zbatimit të reformës zgjedhore në Kosovë.
E pas shumë vite shtyrje të kësaj reforme, duket se tashmë do të nisin punët për të. Kështu për këtë qëllim sot takohet në një mbledhje Komisioni Ad-Hoc për Reformën Zgjedhore në Kosovë.
Në këtë mbledhje do të bëhet caktimi dhe organizimi i punëtorisë së radhës së Komisionit.
Ky komision nisi punën pasi është konstituar në fillim të këtij korrik me 71 vota për, asnjë kundër dhe një abstenim në Kuvendi i Kosovës.
Pjesë e këtij komisioni do të jenë deputetë e partive politike, ndërsa drejtimi do të ketë Partia Demokratike e Kosovës (PDK).
Nga Lëvizje Vetëvendosje (LVV) do të jetë zëvendëskryetar Adnan Rrustemi, anëtarë, Arbreshë Kryeziu, Mimoza Kusari-Lila dhe Dimal Basha.
Nga Partia Demokratike e Kosovës (PDK) do të jenë anëtarë Ilmi Reçica, ndërsa Abelard Tahiri kryetar i Komisionit.
Nga Lidhja Demokratike e Kosovës (LDK) anëtarë të këtij komisioni do të jenë Avdullah Hoti dhe Hykmete Bajrami.
Nga Aleanca për Ardhmërinë e Kosovës (AAK) anëtar është Besnik Tahiri.
Nga grupi multietnik është deputeti Enis Kervan i cili është edhe zëvendëskryetar i dytë.
Deklarata për formimin e këtij komisioni është nënshkruar nga partitë politike më 13 prill të këtij viti.
Ndërsa janë bërë një dekadë prej kur në Kosovë është iniciuar reforma zgjedhore. Kjo reformë do të përmirësonte procesin zgjedhorë, duke filluar me certifikimin e kandidatëve, listën e votuesve, votimin e diasporës, afatet kohore, financimin e partive politike, etj.
Kosova ka mbajtur një sërë procesesh zgjedhore pa përmbyllur reformën zgjedhore, e cila ishte iniciuar qysh në vitin 2011.
Mekanizmat ndërkombëtarë si Komisioni Evropian, në raportet vjetore për Kosovën kanë ngritur shqetësim për ngecjen në reformën zgjedhore.
Ndërkohë, një kërkesë të vazhdueshme për reformë zgjedhore në Kosovë kanë pasur edhe përfaqësuesit e shoqërisë civile.
E me ardhjen e Lëvizjes Vetëvendosje në pushtet, reforma ka nisur të shtrohet e diskutohet në institucionet përkatëse. Vetëvendosje e ka pasur edhe premtim elektoral se do të shtyjë përpara reformën, sidomos për faktin se do të rregullohet çështja e votimit të diasporës, që deri më tani është përcjell me shumë vështirësi./KosovaNews/
