Zëvendëskryeministri i Kosovës, Besnik Bislimi, deklaroi se të dielën pati plan ruso-serb që të digjej pika kufitare e Jarinjës, në veri të vendit, raporton KosovaNews
Ai bërëiu këtë reagim në një shkrim në Facebook të hënën, ku tha se plani u parandalua nga institucionet e Kosovës, në bashkëpunim me partnerët, veçmas me ata amerikanët.
“Grafiku i punuar nga institucionet e sigurisë, që pasqyron vetëm krizën e djeshme në Jarinjë, tregon qartë edhe aktorët e përfshirë dhe autorin e vërtetë, Putinin. Ka pasur plan ruso-serb, që dje të digjej pika kufitare e Jarinjës. Ky plan u parandalua nga institucionet e Republikës së Kosovës (veçmas mekanizmat e sigurisë), në bashkëpunim me partnerët perëndimorë (veçmas amerikanët)”, shkroi Bislimi.
Ai shtoi se pavarësisht se policia e Serbisë, dje u shfaq duke i ndaluar huliganët që mos ta djegin Jarinjën, ky quhet vetëm një akt tërheqjeje nga ana serbe, duke e parë se një gjë e tillë do t’iu dështonte.
“Dje Serbia nuk i ndaloi huliganët serbë – ajo u tërhoq nga plani për djegien e Jarinjës. Intensiteti i sulmeve hibride të Serbisë dhe Rusisë ndaj Republikës së Kosovës është rritur ndjeshëm”, ka thënë ai.
Por Bislimi ka theksuar se siç e ka Serbia aleat Rusinë e Kinën, ne (Kosova) e kemi aleat Perëndimin dhe ShBA-në.
“Ata përfaqësojnë agresionin, ne përfaqësojmë lirinë!”, ka shkruar mes tjerash Bislimi./KosovaNews
Protesta e grupeve djathtiste serbe u përshkua me incidente, pasi protestuesit bënë përpjekje të thyejnë kordonin policor.
Në anën e kufirit të Kosovës dolën edhe pjesëtarët e misionit të NATO-s në Kosovë, KFOR.
Barrikadat në veri të Kosovës janë vendosur që nga 10 dhjetori, në shenjë pakënaqësie ndaj arrestimit të një ish-polici serb të Kosovës.
Dejan Pantiq, sipas autoriteteve në Kosovë, dyshohet se ka organizuar “sulmin terrorist” ndaj zyrave të Komisionit Qendror të Zgjedhjeve në veri.
Për shkak të incidenteve të armatosura dhe vendosjes së barrikadave, autoritetet në Kosovë që nga 10 dhjetori kanë mbyllur përkohësisht dy pikat kufitare në veri: Jarinjë dhe Bërnjak.
