Inspektorati Policor i Kosovës i ka rekomanduar Policisë së Kosovës suspendimin e dy zyrtarëve policorë të policisë kufitare të Drejtorisë Rajonale Kufitare – Lindje, respektivisht Stacionit Policor për Mbikëqyrje të Kufirit Qafë Morinë.
Veprimet hetimore në këtë rast janë vazhdimësi e operacionit të IPK-së të koduar me emrin “Pika” kurse zyrtarët policorë të përfshirë në këtë rast dyshohen për veprat penale “Keqpërdorim i pozitës dhe autoritetit zyrtar” dhe “marrje e ryshfetit”.
Me rekomandim të IPK-së dy zyrtarët policorë janë suspenduar përderisa hetuesit e IPK-së në koordinim më Prokurorinë e Shtetit do të vazhdojnë të ndërmarrin edhe veprime të tjera hetimore drejt ndriçimit të plotë të të gjitha rrethanave që ndërlidhen më këtë rast.
Një operacion i zhvilluar në muajin mars nga Inspektorati Policor i Kosovës në koordinim me Prokurorinë Speciale i pati vënë në pranga thuajse gjithë stacionin e policisë kufitare në Gjakovë.
IPK në kuadër të operacionit “Pika” pati arrestuar 50 zyrtarë policorë që ishin të angazhuar në pikë kalimeve kufitare në Qafë Prush dhe Qafë Morinë, si dhe dy zyrtarë doganorë, që të gjithë të dyshuar për veprat penale “keqpërdorim i detyrës apo autoritetit zyrtar” “marrje e ryshfetit”./KosovaNews/