Ministri për Komunitete dhe Kthim në Qeverinë e Kosovës, Nenad Rashiq, teksa ka komentuar zgjedhjet e së dielës në katër komunat veriore të Kosovës ka thënë se asnjë sistem nuk do të donte një përqindje aq të vogël të pjesëmarrjes.
Në një konferencë për media pas mbledhjes së Qeverisë, Rashiq ka theksuar se ekziston një vazhdimësi e keqpërdorimit të serbëve në Kosovë nga ana e një regjimi autokrat që i përdor ata si mjet për të arritur qëllimet e veta.
“Kjo që ka ndodhë në fundjavë është një sfidë e përkohshme sepse asnjë sistem nuk preferon një përqindje aq të vogël, që 2-3-4 për qind që të votohet në një proces i quajtur demokratik por është një planifikim apo vazhdimësi e keqpërdorimit të serbëve në Kosovë nga ana e një regjimi autokrat që i përdor serbët si mjet për të arritur qëllimet e veta, dhe në aspektin njerëzor nuk mund të kuptoj se çfarë po përpiqen të bëjnë”, ka thënë ai.
Megjithatë ai ka shprehur gatishmëri që të bashkëpunojë me partitë shqiptare që kanë fituar në veri dhe me të gjithë qytetarët.
“Kushdo që të jetë ai apo ajo që ta prish një mundësi të arritjes së një marrëveshjeje si ajo e Ohrit, që është një bazë e mirë për të vazhduar procesin e pajtimit, dhe kur them këtë flas në emër të qytetarëve serbë të Kosovës të cilët më së shumti mund të humbin nëse nuk arrihet një marrëveshje e tillë dhe në veçanti nëse nuk respektohet. Bashkëpunimi jonë do të jetë për të gjithë qytetarët atje. Presioni në atë pjesë është shumë i madh dhe do t’i pres të gjithë ata që janë të gatshëm për bashkëpunim qoftë në nivelin komunal apo me njerëz, grupacione e individë kushdo qoftë jam i gatshëm për bashkëpunim”, shtoi Rashiq.
