Gjatë 24 orëve të fundit në Kosovë janë raportuar në polici dhjetë raste të dhunës në familje.
Tri raste janë raportuar në Prishtinë, dy në Malishevë, e nga një në Gjakovë, Fushë-Kosovë, Pejë, Shtërpcë e Zveçan.
Në Prishtinë në dy raste bashkëshortët janë arrestuar si të dyshuar për sulme fizike ndaj bashkëshorteve. E në një rast është arrestuar një person nën dyshimin se ka sulmuar motrën.
“Prishtinë 05.11.2024-17:00. Është arrestuar i dyshuari mashkull kosovar, pasi që i njëjti ka sulmuar fizikisht bashkëshorten e tij, viktimën femër shtetase e Arabisë Saudite. Viktima ka pranuar tretman mjekësor, ndërsa i dyshuari me vendim të prokurorit dërgohet në mbajtje”, thuhet në raportin 24-orësh të Policisë.
Në Fushë-Kosovë është arrestuar një burrë nën dyshimin për sulm fizik ndaj bashkëshortes. Ai dyshohet po ashtu se gjatë fjalosjes me familjarët e bashkëshortes, ka shtënë me armë zjarri e më pas armën e ka hedhur nga dritarja. I dyshuari është dërguar në mbajtje dhe është sekuestruar arma.
Në Shtërpcë një grua ka raportuar se është sulmuar nga bashkëshorti. I dyshuari është arrestuar për dhunë në familje dhe mosrespektim të vendimit të gjykatës.
E në Pejë është arrestuar një person i dyshuari për dhunë psikike ndaj bashkëshortes.
Në Malishevë, policia ka arrestuar një person nën dyshimin se kishte sulmuar bashkëshorten dy ditë më parë, e në një rast tjetër, po në Malishevë, një grua ka raportuar se është kërcënuar nga ish-bashkëshorti nëpërmjet rrjeteve sociale.
Në Gjakovë është arrestuar një i dyshuar për sulm ndaj bashkëshortes dhe është dërguar në mbajtje.
Një rast i dhunës në familje është raportuar edhe në Zveçan.
Po ashtu të martën janë arrestuar edhe dy persona lidhur me raste të dhunës në familje që ishin raportuar më herët. Njëri është arrestuar në Prishtinë nën dyshimin për një rast të dhunës në familje më 2 nëntor e tjetri në Ferizaj nën dyshimin se më 1 nëntor kishte kërcënuar ish-bashkëshorten. Të dy janë dërguar në mbajtje.
