Kryeministri i Shqipërisë, Edi Rama theksoi se pas Miamit vjen për herë të parë në Evropë, e pikërisht në Shqipëri, FII (Future Investment Initiative), platforma e famshme globale, e cila mbledh liderë politikë, drejtues të korporatave të mëdha në botë, sipërmarrës të mëdhenj nga të gjitha kontinentet, për diskutimin e inovacionit, investimeve dhe të ardhmes së ekonomisë botërore.
Rama në Forumin Ndërkombëtar për të ardhmen e Evropës që po mbahet në Tiranë, ku ishte i pranishëm edhe presidenti francez Emmanuel Macron, shprehu krenarinë për ndryshimet e realizuara në Shqipëri.
Ai tha se janë shumë krenarë për atë që kanë arritur deri tani.
“…Askush nuk do ta kishte imagjinuar atë çfarë po ndodh sot, as dje, por po flas për imagjinatën e 5 ose 10 viteve më parë. Kemi bërë një rrugë të gjatë dhe tani jemi dëshmitarë të rezultateve të ndryshimeve që po realizojmë. Kjo është diçka që na jep shumë kënaqësi, por gjithashtu na tmerron, sepse përgjegjësia është e madhe dhe kërkesa për rezultate të nivelit të lartë rritet çdo ditë”, tha ai.
Duke iu referuar fjalëve të Trump për “epokën e artë” të SHBA-së, Rama u shpreh se kjo mund të jetë e mundur edhe për Evropën, nëse ajo arrin të mendojë jashtë kornizës dhe të veprojë me guxim, raporton euronews.al.
