Qeveria e Republikës së Kosovës e ka mbajtur mbledhje elektronike, në të cilën ka miratuar një projektligj, dy raporte dhe një vendim.
Pas shqyrtimit nga kabineti qeveritar, është aprovuar Projektligji për Ratifikimin e Marrëveshjes Kompakt të Sfidave të Mijëvjeçarit dhe Marrëveshjes për zbatimin e Programit ndërmjet Republikës së Kosovës dhe Shteteve të Bashkuara të Amerikës, përfaqësuar nga Korporata e Sfidave të Mijëvjeçarit (MCC).
Qeveria ka shqyrtuar dhe miratuar Raportin gjashtëmujor të Buxhetit për vitin 2022 si dhe Raportin vjetor financiar të rishikuar për vitin 2021.
Ndërkaq ka marrë miratimin e kabinetit qeveritar edhe vendimi për ndryshimin dhe plotësimin e Vendimit të Qeverisë Nr. 13/19 të datës 14 korrik 2021 me ndryshimet dhe plotësimet e bëra, lidhur me Pakon e Ringjalljes Ekonomike.
Në fakt, plotësimi dhe ndryshimi i vendimit i shton Masës 1 të Pakos së Ringjalljes Ekonomike edhe masën 1.8 – Skema “Qeveria për familjet”- për të cilën ndahen 10 milionë euro.
Kush mund të jetë përfitues
Çdo qytetari të Kosovës, i cili është mbajtës i një familjeje në të cilën nuk punon asnjë anëtar, do t’i ofrohet punësim përmes skemës “Qeveria për familjet”.
Ministri i Financave në Qeverinë e Kosovës, Hekuran Murati, ditë më parë me rastin e lansimit të kësaj pakoje, i bëri të ditura detajet në një konferencë për media.
Për të përfituar nga kjo skemë, mbajtësi i familjes duhet të jetë i moshës së punës, 18-65 vjeç, të mos ketë asnjë anëtar të familjes të punësuar dhe të jetë i regjistruar si i papunë apo punëkërkues në Agjencinë e Punësimit të Kosovës (APK).
Sipas Qeverisë së Kosovës, kjo skemë vjen në kuadër të Pakos për Rimëkëmbje Ekonomike.
Kjo pako, me vlerë prej 420 milionë eurosh, është miratuar nga Qeveria e Kosovës vitin e kaluar, për t’i ndihmuar qytetarët dhe bizneset t’i adresojnë humbjet e pësuara nga pandemia e koronavirusit.
Bizneseve do t’u ofrohen subvencioneve nga Qeveria
Bizneseve që i punësojnë mbajtësit e papunë të familjeve, do t’u ofrohen subvencioneve nga Qeveria.
“Subvencionimi është deri në 300 euro. Paga mund të jetë më e lartë, por Qeveria subvencion pagë deri në 300 euro”, tha Murati.
Bizneset, që duan t’i punësojnë këta qytetarë dhe të përfitojnë nga subvencionet, duhet të aplikojnë në Zyrat e Punësimit nëpër komunat e tyre.
Nga kjo kategori, ato nuk mund të punësojnë më shumë se 30 për qind të stafit ekzistues.
“Nëse një kompani ka dhjetë punëtorë, ajo mund të punësojë tre punëtorë përmes kësaj mase”, tha Murati.
Bizneset duhet të jenë të regjistruara dhe aktive në Administratën Tatimore të Kosovës, ndërsa organizatat joqeveritare, që po ashtu kanë interesim për të punësuar mbajtës familjesh, duhet të jenë të regjistruara dhe aktive në Ministrinë e Punëve të Brendshme të Kosovës.
Si bëhet aplikimi
Punëdhënësit duhet t’i paraqesin te Zyrat e Punësimit pozitat që u nevojiten, e pastaj Agjencia e Punësimit do të bëjë ndërlidhjen mes tyre dhe punëmarrësve.
Aplikimi i punëmarrësve dhe punëkërkuesve për këtë skemë ka nisur nga 18 korriku 2022./KosovaNews/
