Qeveria e Kosovës në mbledhjen e mbajtur të martën ka miratuar Projektligjin për ndarjet buxhetore për vitin 2024.
Kryeministri Albin Kurti tha se pa ndryshime në normat tatimore kanë arritur që për çdo vit të rrisin buxhetin e shtetit.
Ai bëri të ditur se për vitin 2024 buxheti i Republikës së Kosovës do të jetë 3 miliardë e 314 milionë euro.
“Kemi rritur ekonominë, janë shtuar vendet e punës. Kjo është si rezultat i masave të suksesshme për rritjen e ekonomisë. Buxheti i shtetit për vitin 2024 do të jetë 3 miliardë e 314 milionë euro”, tha ai.
Kurti deklaroi se do të rriten pagat në sektorin publik dhe koeficienti do të jetë 110 euro, ndërsa do të ketë investime të shumta.
“Ky buxhet është i të gjithëve. Si Qeveri e kemi detyrë të menaxhojmë mirë, e të shtojmë vendet e reja të punës. Kemi edhe sfida tjera që do të përballemi”, deklaroi kryeministri Kurti.
Sipas ministrit të Financave, Hekuran Murati, të hyrat buxhetore për vitin 2024 pritet të arrijnë në 3 miliardë e 28 milionë euro, që ai ka thënë se paraqet një rritje prej 5 për qind në raport me vitin paraprak.
“Rritja ekonomike në 2023-n pritet të përmbyllet me 4 për qind në terma realë, e 9 për qind në terma nominalë. Rritjes ekonomike do t’i paraprijë edhe një dinamikë e përshpejtuar e ekzekutimit të investimeve kapitale publike dhe orientimit në sektorë prioritarë. Presim që në 2024-n të hyrat e buxhetit të arrijnë në 3 miliardë e 28 milionë euro, që paraqet një rritje prej 5 për qind në raport me vitin paraprak”, ka thënë Murati.
Kryeministri Albin Kurti, në këtë mbledhje ka thënë se Qeveria e tij, si asnjëherë më parë është përballur me më shumë sfida, se secila Qeveri që nga paslufta.
Ai ka thënë se në këtë mandat kanë menaxhuar pandeminë, kanë tejkaluar krizën energjetike dhe kanë mbështetur qytetarët për t’u përballur me inflacionin.
Sipas tij për 31 muaj të mandatit të tyre, ekonomisë së vendit i janë shtuar 60 mijë vende të reja pune.
“Që prej marrjes së mandatit në mars të vitit 2021 jemi ballafaquar me më shumë sfida globale se cilado qeveri tjetër që nga paslufta. Gjasat për një pandemie siç ishte ajo e COVID-19 janë një në 100 vjet, çmimet e energjisë që i pamë vitin e kaluar nuk ishin parë asnjëherë e ndoshta krahasimi më i përafërt është ai me krizën e naftës në vitit ’70, pra një herë në 50 vjet. Inflacion dyshifror në nivel global, për herë të parë ishte parë në vitet ’80, pra një herë në 40 vjet”, ka theksuar Kurti.
