Në Moldavi janë përmbyllur zgjedhjet parlamentare, të cilat u zhvilluan nën hijen e debateve për “ndërhyrje ruse” në procesin zgjedhor.
Sipas rezultateve paraprake jozyrtare, Partia e Veprimit dhe Solidaritetit (PAS) e presidente Maia Sandu, e cila ndjek një linjë të qartë pro-Bashkimit Evropian, ka dalë fituese me 49,63% të votave, transmeton KosovaNews.
Pjesëmarrja në votime ishte 52%, ndërsa rezultatet përfundimtare pritet të konfirmohen nga Gjykata Kushtetuese brenda pesë ditëve të ardhshme.
Blloku pro-rus mbetet në opozitë
Blloku “Patriotik”, që mban një qasje të afërt me Moskën, mbeti sërish në opozitë, pavarësisht pritjeve për një rikthim të fortë në pushtet.
Megjithatë, përfaqësues të këtij blloku deklaruan se do të përpiqen të formojnë një koalicion me partitë e tjera parlamentare, me synimin për të rrëzuar qeverinë aktuale.
Në përbërjen e re të parlamentit me 101 ulëse, do të përfaqësohen tre parti dhe dy blloqe.
Ndalimi i partisë pro-ruse “Zemra e Moldavisë”
Këto zgjedhje u shoqëruan nga polemika të mëdha për ndërhyrje të Rusisë dhe përjashtimin e partisë pro-ruse “Zemra e Moldavisë” nga gara zgjedhore.
Vendimi u mor nga Komisioni Qendror Zgjedhor vetëm pak ditë para votimit, duke u bazuar në një aktgjykim të Gjykatës së Apelit në Chișinău që pezullonte aktivitetet e partisë për 12 muaj.
Sipas Ministrisë së Drejtësisë, hetimet ndaj anëtarëve të saj kishin zbuluar blerje votash, financim të paligjshëm dhe pastrim parash. /KosovaNews/
Lexo po ashtu:
