Organizata joqeveritare Iniciativa për Progres (INPO) me mbështetje të Rockefeller Brothers Fund, ka publikuar Analizën “Sfidat e prokurimit për ushqimin e FSK–së”.
Në një raport të detajuar prej 18 faqesh monitoruesit e INPO kanë gjetur një varg parregullësishë, favorizime dhe lojrat ligjore në kontratat për furnizim me ushqim të Ministrisë së Mbrojtjes.
Në këtë raport INPO theks të veçant i është kushtuar falsifikimit të certifikatave ISO dhe dokumenteve të tjera të rëndësishme nga operatori fitues “Beni Dona” dokumente këto që ishin të vërtetuara edhe nga institucionet e sigurisë së Kosovës por edhe ato gjermane.
“Raporti i hetimeve të nisura nga Prokuroria Speciale konfirmoi se certifikatat e dorëzuara ishin të falsifikuara, por kjo prokurori hodhi kallximin penal për mungesë të përgjegjësisë penale të operatorit ekonomik” thuhet në raport
Përkundër këtyre gjetjeve, në raportin e INPO-së thuhet se këto shqetësime nuk u morën për bazë as nga Ministria e Mbrojtjes, e as nga Organi Shqyrtues i Prokurimit edhe pse ishin plotësuar kushtet ligjore për ndërprerje të kontratës kompanisë “Beni Dona Plast”.
“Megjithatë, procedura e vlerësimit të origjinialitetit të këtij dokumentacioni nuk u trajtua nga Ministria e Mbrojtjes, e as nga OSHP përmes hetimeve administrative. Përkundër informatës së mëhershme të marrë nga Policia e Kosovës për falsitetin e dokumenteve, kjo ministri nuk ndërmori veprime për ndërprerje të kontratës, edhe pse ishin plotësuar kushtet ligjore për shkak të papërgjegjshmërisë së operatorit ekonomik “Beni Dona Plast”. Përkundrazi, ky aktivitet vazhdoi së implementuari sipas afatit të kontraktuar deri më 31.03.2023” thuhet ndër të tjeara në raport.
Analiza sjell një përmbledhje të detajuar mbi prokurimin e shërbimeve ushqimore për Forcën e Sigurisë së Kosovës, duke shqyrtuar ligjshmërinë dhe efektivitetin e procedurave të ndjekura nga Ministria e Mbrojtjes gjatë viteve 2018-2024. Analiza nxjerr në pah një sërë problemesh të rëndësishme, përfshirë mungesën e transparencës, përdorimin e shpeshtë të procedurave të negocimit pa publikim të njoftimit për kontratë, trajtimin jo të barabartë të operatorëve ekonomikë, konsistencën e diskutueshme të vendimeve nga OSHP dhe rolin e KRPP-së.
Një nga çështjet kryesore të identifikuara në këtë hulumtim është dhënia e kontratës për operatorin ekonomikë të papërgjegjshëm dhe mosndërmarrja e masave të duhura ligjore ndaj dokumentacioneve të dyshimta. Përveç kësaj, përdorimi i “situatave emergjente” ka krijuar një mjedis që cënon konkurrencën e drejtë dhe favorizon operatorë të caktuar.
Për të lexuar më shumë mbi gjetjet dhe rekomandimet për përmirësimin e këtyre proceseve, ju ftojmë të lexoni analizën e plotë të publikuar nga INPO.
