Sot do të mbahet një protestë në solidaritet me gratë në Iran, e organizuar nga OJQ “Youth Initiative for Human Rights Kosovo – YIHR KS”, dhe pritet të nis në ora 12:00 te sheshi “Skënderbeu” në Prishtinë.
Irani është përfshirë kohët e fundit nga protesta të shumta pas vdekjes së një 22-vjeçareje, e cila ishte arrestuar nga e ashtuquajtura polici e moralit, pasi nuk kishte vendosur në mënyrë të duhur shaminë e saj në përputhje me rregullat e atjeshme.
Shumica e protestuesve ishin gra dhe ato hoqën shamitë e tyre të detyrueshme, apo hixhabet gjatë marshimit pas vdekjes së Mahsa Aminit, e cila u ndalua nga policia e mbikëqyrjes së sjelljes nën pretendimet për mosvënien si duhet të shamisë së saj.
Videot në internet tregojnë gra që valëvisin shamitë e tyre, duke brohoritur. Të tjera i kanë djegur ato ose kanë prerë flokët e tyre në shenjë zemërimi ndaj rastit që ndodhi.
Vdekja e Aminit ka zemëruar shumë iranianë, veçanërisht të rinjtë, të cilët e shohin këtë ngjarje si aktin më të fundit të një politike të ashpër të Republikës Islamike ndaj disidentëve dhe trajtimit gjithnjë e më të dhunshëm ndaj grave të reja nga policia mbikëqyrëse e moralit.
Në disa nga demonstratat, protestuesit janë përleshur me policinë.
Ndërkohë, policia e atjeshme e mohoi keqtrajtimin e Aminit dhe tha se ajo ka vdekur nga një atak në zemër. Presidenti Ebrahaim Raisi premtoi se kjo ngjarje do të hetohet.
