Policia e Kosovës ka arrestuar të dielën një 26-vjeçar nën dyshimin se ka kryer aktin e dhunimit ndaj një vajze të mitur në Pejë.
Zëdhënësi i Prokurorisë Themelore të Pejës, Shkodran Nikçi, ka bërë të ditur se ndaj të dyshuarit është bërë kërkesa për caktimin e masës së paraburgimit.
“Personi është arrestuar dhe, me urdhër të prokurorit, është dërguar në mbajtje. Është parashtruar kërkesa për paraburgim”, tha Nikçi.
Sipas tij, policia ka siguruar prova materiale që lidhen me rastin dhe që do të shfrytëzohen gjatë procesit hetimor.
“Janë siguruar prova materiale që do të përdoren gjatë procesit. Dyshimet janë për kryerjen e veprës penale të dhunimit”.
“Viktima është e mitur, kështu që nuk mund të japim më shumë informacione,” deklaroi Nikçi.
