Sherif Konjufca, babai i kryeparlamentarit aktual, Glauk Konjufca, ka qenë i ftuar në emisionin “n’Demos”, ku i pyetur nga gazetari se a ka qenë i biri tij pjesë e Shërbimit Informativ të Kosovë (SHIK), ai është përgjigjur me humor, ndërsa ka treguar pse u ndërtua një lajm i tillë.
Ai tha se raportimet në media dolën për t’ia dëmtuar autoritetin Glaukut, i cili viteve të fundit po shënonte majat e karrierës së tij politike.
Megjithatë, ai ka mohuar se kryetari i Kuvendit, respektivuisht djali i tij, ka qenë anëtar i SHIK-ut.
“Glauku kur bëri autoritet më të madh në Vetëvendosje, oponentët politik duhej të shpiknin diçka me ia zvoglu autoritetin, madje e shpikën se Glauku ka qenë punëtor i SHIK-ut. Për me bo të besueshme këtë thënie e kanë përgatit edhe një librezë, një librezë ku është nënshkrimi i Glaukut, nënshkrimi i Kadri Veselit si drejtor i SHIK-ut edhe nënshkrimi im. Do të thotë dy gabime profesionale kushdo që e ka bo. E para, kreu i organizatës të zbulimit nuk merret me rekrutime, janë tjerë njerëz që merren me rekrutime dhe nuk të japin librezë me nënshkrim të kryetarit. Edhe tjetra, nënshkrimi im çka duhej aty? Djali ishte në moshë madhore, po të ishte nxënës i shkollës fillore lypet nënshkrimi i prindit, po çfarë duhej nënshkrimi im në një librezë të tillë. Kjo tregon se ishte një shpikje amatore”, ka thënë ai.
Konjufca ka rrëfyer edhe takimin me Hashim Thaçin gjatë kohës së Rambujesë.
“Në Konferencën e Rambujesë unë isha takuar me kryeministrin Hashim Thaçin, edhe kisha pasur biseda me të, kur më pa në Mbledhje të Qeverisë edhe ai u habit, por kjo ishte meritë e Bajram Kosumit, unë isha i vetmi punëtor në Ministrinë e Informatave, e u dërgoja të gjitha gazetave informacionet në atë kohë”, deklaroi Sherif Konjufca.
