Princi Harry është përballur me kritika të forta pas intervistës së fundit për BBC-në, ku foli për marrëdhënien e tensionuar me familjen mbretërore dhe për gjendjen shëndetësore të Mbretit Charles, i cili po lufton me kancer.
Gjatë intervistës, Duka i Sussex-it u shpreh se “nuk e di sa kohë ka mbetur” për të atin, një koment që shumë e kanë cilësuar si i papërshtatshëm dhe emocionalisht manipulues.
Ky koment ka nxitur jo vetëm spekulime të reja për përkeqësimin e shëndetit të monarkut, por edhe zemërim nga opinioni publik dhe ekspertët mbretërorë, shkruan DailyMail.
Harry gjithashtu tha se dëshiron një pajtim me familjen e tij, por theksoi se aktualisht nuk ka komunikim me Mbretin Charles për shkak të një mosmarrëveshjeje të vazhdueshme lidhur me çështjet e sigurisë në Mbretëri.
Ai ka kritikuar vendimin që i hoqi të drejtën për mbrojtje policore, duke e lidhur këtë me traumën që përjetoi pas vdekjes së nënës së tij, Princeshës Diana. “Nuk dua që historia të përsëritet”, u shpreh ai me shqetësim.
Pavarësisht dëshirës për pajtim që Harry pretendon se ka, shumë e kanë akuzuar për mungesë të sinqeritetit, duke theksuar se veprimet e tij – sidomos deklaratat publike dhe dokumentarët kundër familjes mbretërore – e përkeqësojnë situatën.
Ekspertët mbretërorë mendojnë se çdo përpjekje e vërtetë për pajtim duhet të ndodhë privatisht dhe me respekt ndaj dinjitetit të familjes, jo përmes medieve.
Nga ana tjetër, burime pranë pallatit mbretëror thonë se Mbretit Charles i vjen keq për distancën me djalin e tij, por ndien gjithashtu zhgënjim për mënyrën se si Harry po e trajton situatën në publik.
Në këtë fazë, marrëdhëniet mbeten të tensionuara dhe pa ndonjë shenjë konkrete se një pajtim i vërtetë është afër.
