Kryetari i Kuvendit të Kosovës, Glauk Konjufca, është ushtrues detyre i presidentit të vendit përkohësisht, pasi presidentja Vjosa Osmani është shtrirë në spital për shkak të një intervenimi të lehtë kirurgjik.
Këtë për KlanKosova.tv e kanë bërë të ditur nga Zyra e Presidentes, tutje thuhet se Osmani nga 3 nëntori do të vazhdojë me ushtrimin e detyrave dhe obligimeve kushtetuese që ndërlidhen me pozitën e presidentes së Kosovës, si dhe gradualisht do t’i kthehet angazhimeve publike.
“Pas rekomandimit nga mjekët specialistë, presidentja e Republikës së Kosovës, Vjosa Osmani i është nënshtruar një intervenimi të lehtë kirurgjik (heqja e tëmthit), i cili është realizuar me sukses. Bazuar në vlerësimin dhe vullnetin e saj, gjatë ditës së djeshme, presidentja Osmani ka bërë bartjen e përkohshme të përgjegjësive të presidentes së republikës tek kryetari i Kuvendit të Republikës së Kosovës, Glauk Konjufca”.
“Nga 3 nëntori, presidentja do të vazhdojë me ushtrimin e detyrave dhe obligimeve kushtetuese që ndërlidhen me pozitën e presidentes së republikës, si dhe gradualisht do t’i kthehet angazhimeve publike. Gjatë kësaj periudhe, kërkojmë mirëkuptimin e medieve për të respektuar të drejtën fundamental për privatësi të presidentes, që është e garantuar me kushtetutë”.
