Presidentja e Kosovës Vjosa Osmani ka bërë homazhe pranë arkivolit të profesorit të ndjerë, Shyqri Nimani.
Përveç Osmanit, në Pallatin e Rinisë homazhe kanë bërë shumë qytetarë dhe krerët e institucioneve: kryeparlamentari Glauk Konjufca, keu i LDK-së Lumir Abdixhiku si dhe kryetari i Prishtinës, Përparim Rama.
Shyqri Nimani njihet si pionier dhe si njëri prej themeluesve të departamentit të dizajnit grafik në Akademinë e Arteve në Prishtinë, ku edhe punoi si profesor deri në pensionimin e tij.
Për shkak të profesionalizmit të tij dhe karrierës së gjatë, atij iu besua që ta shkruajë me kaligrafi deklaratën e Pavarësisë së Kosovës e cila u shpall më 17 shkurt në Kuvendin e Kosovës.
Ai ishte edhe muzikant, artist vizual dhe njohës shumë i mirë i historisë dhe trashëgimisë kulturore.
