Presidentja e Komisionit Evropian, Ursula von der Leyen, sot paradite do të mbërrijë në Kosovë, në kuadër të një turneu vizitash që është duke zhvilluar në Ballkanin Perëndimor.
Bëhet e ditur se në Prishtinë do të pritet nga presidentja Vjosa Osmani dhe kryeministri Albin Kurti.
Arsyeja, sipas njoftimit zyrtar, është Rusia dhe ndikimi i saj në Ballkan, gjegjësisht në raport me energjinë dhe manipulimin e tregjeve.
Tutje thuhet se shefja e KE-së do të shprehë mbështetjen e BE-së ndaj partnerëve të Ballkanit Perëndimor në luftimin e çmimeve të larta të energjisë dhe përmirësimin e sigurisë afatgjate të vendeve të Ballkanit Perëndimor për sa i përket energjisë.
Pas Kosovës, shefja e KE-së do të udhëtojë në Shqipëri ku do të ketë takime me krerët e shtetit atje. Ndërsa më pas do të udhëtojë edhe në Bosnje e Hercegovinë, Serbi si dhe në Mal të Zi./KosovaNews/
