Presidenti i Republikës së Shqipërisë, Bajram Begaj, është takuar me Sekretarin e Përgjithshëm të OKB-së, Antonio Guterres.
Takimi i tyre erdhi përgjatë punimeve të Sesionit të 80-të të Asamblesë së Përgjithshme të Kombeve të Bashkuara.
Përmes një postimi në rrjete sociale, Begaj ndan foton zyrtare mes tij dhe Guterres, teksa shkruan se i ka shprehur mirënjohjen Guterres për lidershipin e tij përgjatë sfidave të OKB-së dhe multilateralizmit.
Po kështu, mes dyshes pati një bisedë, që siç shkruan President Begaj, u përqëndrua në rolin aktiv të Shqipërisë në ruajtjen e paqes dhe sigurisë, nxitjen e zhvillimit të qëndrueshëm, si dhe mbrojtjen e të drejtave të njeriut.
“Kënaqësi të ritakohem me Sekretarin e Përgjithshëm të OKB-së, António Guterres, në kuadër të punimeve të Sesionit të 80-të të Asamblesë së Përgjithshme të Kombeve të Bashkuara.
Biseda miqësore u përqendrua në rolin aktiv të Shqipërisë në ruajtjen e paqes dhe sigurisë, nxitjen e zhvillimit të qëndrueshëm dhe mbrojtjen e të drejtave të njeriut.
I shpreha mirënjohjen Sekretarit të Përgjithshëm Guterres për lidershipin e tij gjatë këtyre kohëve sfiduese për Organizatën dhe multilateralizmin“, shkruan President Begaj në rrjete sociale.
