Habitej që qytetarët edhe në këtë kohë po presin autobusë në këmbë e pa ndonjë mbulesë mbi kokë.
Ish-kandidati i PDK-së për kryetar të Prishtinës, Uran Ismaili, gjatë fushatës zgjedhore improvizoi dy pritore duke vendosur ulëse në Hajvali e Kodër të Trimave.
Por krejt kjo ka mbetur në një premtim zgjedhor, edhe pse PDK-ja udhëheq Drejtorinë e Shërbimeve Publike që përgjegjësi ka pritoret.
Dek. Ilirik Musliu, drejtor i Shërbimeve Publike
“Është paraparë që i gjithë kryeqyteti të përfshihet nga pritoret e autobusëve e që realisht tash jemi duke e bërë atë. Nuk do të largohen ato derisa të vijnë pritoret e reja. Realisht ajo ka qenë një shenjë që ka simbolizuar që aty ka nevojë për pritore, që aty njerëzit rrijnë në kushte të ndryshme atmosferike. Ju premtoj që shumë shpejtë do të jemi gati, operatori është gati të fillojë me instalim”, ka thënë Musliu.
E shtyrë në moshë duke mos pasur ku të ulet, kjo grua mbështetet në rrethojat që u vendosën nga ish-kryetari, Shpend Ahmeti.
Qytetarët të cilët po presin në këtë gjendje, thonë se Komuna po punon shumë pak, prandaj ata po detyrohen të presin në shi.
Vitin e kaluar Komuna ka prezantuar planin për mbulimin e stacioneve me pritore.
Pritoret që u vendosën 2 vjet më parë në qendër të Prishtinës do të zhvendosen në periferi për t’u zëvendësuar me të rejat.
Muaj më parë u vendos një pritore e re si mostër në stacionin afër Katedrales. Kanë kaluar disa muaj dhe pritoret e tjera nuk janë zëvendësuar.
Drejtori i Shërbimeve Publike, Ilirik Musliu, thotë se ata janë në fazën e ndërtimit të të gjitha stacioneve për të filluar pastaj me implementimin e tyre.
“Ne kemi përcaktuar 50 lokacionet e formatit A, po pritet tash, janë duke u punuar stacionet, në momentin kur të përfundohen që të gjitha 50. Këto që janë momentale do t’i zhvendosim në 50 pika B. Ende nuk i kemi përfunduar komplet 50 lokacionet e tipit B, në momentin që përfundohen edhe ato, zhvendosja do të bëhet në ato lokacione ku ne mendojmë”, ka shtuar Musliu.
Sipas tij, do të jenë gjithsej 150 pritore që do të mbulojnë stacionet në gjithë Prishtinën.
Ndryshe, me vendosjen e pritoreve dhe me ardhjen e autobusëve të rinj, sipas kësaj drejtorie, pritet të përmbyllet pjesa e zbatimit të planit të mobilitetit.
