Visar Bekaj është dënuar me pezullim prej 12 muajve nga Komisioni i Disiplinës dhe Etikës i Federatës Shqiptare të Futbollit (FSHF).
Sipas këtij Komisioni, portieri i Kosovës është dënuar për nxitje të urrejtjes dhe akteve të dhunës, shkruan Gazeta Express.
Bekaj gjithashtu është gjobitur edhe me 100 mijë lekë.
“Lojtari i KF Tirana, Visar Bekaj, për nxitje të urrejtjes dhe akteve të dhunës, në bazë të nenit 51/1 të KDS, dënohet me 12 (dymbëdhjetë) muaj pezullim nga të gjitha aktivitetet dhe gjobë në masën 100.000 (njëqind mijë) lekë”, thuhet në njoftimin e lëshuar nga FSHF-ja.
Ky vendim vije një ditë pas incidenteve të ndodhura në ndeshjen e javës së 35-të në Kategorinë Superiore, mes Tiranës dhe Bylisit, që u mbyll baras 2:2. Kjo ndeshje u përcoll gjithashtu edhe me polemika të ndryshme.
Pas përfundimit të ndeshjes, tifozët e Tiranës u futën në fushë dhe e sulmuan gjytarin e ndeshjes, ndërsa Bekaj nuk është përmbajtur në një deklaratë televizive.
Përveç reprezentuesit kosovar, masa u morën edhe ndaj disa futbollistëve tjerë.
Ndaj KF Tiranës është marrë një masë e përkohshme që ndeshjet në shtëpi t’i luajë pa shikues në një afat prej 90-të ditësh.
