Nënshkrimi i deklaratës për personat e zhdukur nga lufta e fundit dhe drafti i Asociacionit të Komunave me Shumicë Serbe, janë çështjet për të cilat do të diskutohet në takimin e sotëm që pritet të mbahet pasdite në Bruksel.
Ky është edhe takimi i parë mes kryeministrit të Kosovës, Albin Kurti, dhe presidentit të Serbisë, Aleksandër Vuçiqi, që pas marrëveshjes së Ohrit.
Bashkimi Evropian ka konfirmuar tashmë se thirrjes së përfaqësuesit të lartë të BE-së, Josep Borrell, për këtë takim, i janë përgjigjur pozitivisht të dy liderët.
Ky takim bëhet nën ndërmjetësimin e shefit të politikës së jashtme të Bashkimit Evropian, Josep Borrell, dhe emisarit për dialogun, Miroslav Lajçak.
Siç raportohet takimi do të fillojë në orën 18:00 dhe thuhet se do të fokusohet në zbatimin e Marrëveshjes për rrugën drejt normalizimit ndërmjet Kosovës dhe Serbisë.
Palët pritet të miratojnë Deklaratën për Personat e Zhdukur si pikë të parë të rendit të ditës, e cila do të pasohet nga prezantimi/një diskutim mbi draft-statutin e parë të Asociacionit/Bashkësisë së Komunave me shumicë Serbe në Kosovë.
Palët do të kenë gjithashtu mundësinë të diskutojnë çështje aktuale me rëndësi politike.
Ndërkaq do të ketë edhe një deklaratë për mediat nga Josep Borrelli në fund të takimit.
