Kryetari i Kuvendit të Kosovës, Glauk Konjufca ka pësuar një lëndim dhe për shkak nuk do të jetë në gjendje që të shkojë në vendin e tij të punës për disa ditë.
Lajmin për lëndimin e kryekuvendarit e ka konfirmuar edhe shefi i kabinetit të tij, Ilir Kërqeli, i cili tha se bëhet fjalë për lëndim të këmbës.
I kontaktuar nga KosovaNews, Kërqeli tha se Konjufca ka pësuar një krisje të kapakut të gjurit dhe për këtë i kanë rekomanduar mjekët disa ditë pushim.
Gjatë ditës disa media duke u thirrur në burime të tyre raportuan se Konjufca përkundër lëndimit, nuk është trajtuar në institucionet shëndetësore publike, duke lënë të nënkuptohet se është trajnuar në ndonjë klinikë private.
Por një gjë të tillë e ka përgënjeshtruar shefi i kabinetit të kryekuvendarit, Ilir Kërqeli, i cili tha raportimi në fjalë është i pavërtetë, pasi që Konjufca mori trajtim në një prej klinikave të QKUK-së.
“Ajo që kanë raportuar disa media nuk është e vërtetë. Kryetari ka pësuar një lëndim dhe për këtë arsye në repartin e Kirurgjisë mbrëmë rreth orës 19:30 ka bërë ekzaminimet e nevojshme nga të cilat ka rezultuar se ka një krisje të kapakut të gjurit. Mjekët i kanë rekomanduar që të pushojë disa ditë”, ka thënë ai për KosovaNews.
