Ministrja e Ekonomisë, Artane Rizvanolli, i tha deputetit të AAK-së, Besnik Tahiri, se “fjalimi i juaj të paska mbetur i vitit të kaluar”.
Rizvanolli tha se strategjia e energjisë është sjell në kuvend në dhjetor, ndërsa është miratuar më 8 mars, teksa shtoi se shpenzimet kapitale s’janë veç asfal.
“Shpenzime kapitale janë edhe ato në eficiencë të energjisë që janë realizuar në nivel 9 milionë euro gjatë dy viteve të kaluara, e përmes të cilave janë rinovuar 70 shkolla, çerdhe, stacione zjarrfikësish, e ambulanta”.
“Investime kapitale janë edhe në sektorin e telekomunikacionit, sidomos në shekullin që po jetojmë. 7.7 milionë euro janë realizuar për të arritur rezultate impresionuese rekorde për Evropën. Kemi arritur që të mbulojmë të gjitha lokalitetet e banuara të Kosovës me internet brezgjerë për të arritur përqindjen më të lartë në top 5 shtetet në Evropë të përdorimit të internetit në 98.8 për qind”, është shprehur Rizvanolli.
Tutje, ajo tha se për sa i përket propozimit të LDK-së pr heqjen e TVSH-së, Rizvanolli tha se një gjë e tillë po rekomandohet në kohën kur qeveria e ka subvencionuar energjinë elektrike.
Deputeti i Aleancës për Ardhmërinë e Kosovës (AAK), Besnik Tahiri, ka paraqitur propozim-rezolutën për punën dyvjeçare të Qeverisë së Kosovës.
Ai ka thënë se sektori publik në Kosovë nuk ka qenë asnjëherë në krizë më të madhe.
“Sot Qeveria udhëhiqet me ushtrues detyre në nivelet më të larta të shtetit. A e dini pse, sepse me një email vendosen dhe me një email shkarkohen. Sot Ligji i pagave ka ndihmuar 10 mijë njerëz, 70 mijë nuk e dinë saktësisht sa e kanë pagën e tyre”, ka theksuar Tahiri.
Ai ka kritikuar Qeverinë edhe për mungesë të investimeve kapitale. Ka përmendur disa rrugë magjistrale të cilat sipas tij janë lënë në gjendje të mjerueshme.
“Çka kanë bërë është që e kanë lidhur fshatin e Arben Gashit dhe Bekë Berishës me një urë”, është shprehur Tahiri.
Ai ka thënë se rezoluta e tyre parasheh disa pika dhe është alarm për kryeministrin dhe kabinetin e tij, anëtarët e të cilit sipas tij, nuk e kanë bërë asnjë veprim.
