Presidenti i Shqipërisë, Bajram Begaj është pritur të hënën me nderime të larta shtetërore nga presidentja e Kosovës, Vjosa Osmani
Për presidentin e ri shqiptar kjo është vizita e parë zyrtare në Kosovë dhe vjen me ftesë të presidentes Osmani. Ai do të qëndrojë në Kosovë për dy ditë.
Pas takimit, Osmani dhe Begaj kanë mbajtur edhe një konferenfcë për medie, ku mes tjerash është shprehur nevoja e rëndësishme që Kosova dhe Shqipëria ta kenë një traktat për mbrojtje të përbashkët që në mënyrë reciproke të reagohet në rast të cenimit të një prej këtyre dy vendeve.
E pas takimeve dhe konferencës, presidentja Vjosa Osmani ka shkruar edhe në rrjetin social Facebook, ku thekson se për çfarë do të punojë ngushtë me presidentin Bajram Begaj.
“Me Presidentin Bajram Begaj do të punojmë ngushtë për ta avancuar rrugëtimin evropian të shteteve tona, për ta fuqizuar zërin tonë kudo në botë dhe për të qëndruar bashkërisht në mbrojtjen e demokracisë, paqes dhe lirisë”, ka shkruaj Osmani.
Ajo tha se kjo vizitë e Begajt vazhdon traditën e presidentëve nga Shqipëria, të cilët e nisin mandantin e tyre me vizitën në Kosovë si konfirmim i mbështetjes së parezervë për Republikën e Kosovës, si dhe përkushtimin e ndërsjellë për t’i thelluar raportet tona si shtete simotra.
