Ministri i Jashtëm i Suedisë, Tobias Lennart Billström, ka thënë se Kosova dhe Serbia duhet t’i zbatojnë zotimet e arritura në marrëveshjen e Ohrit.
Ai tha se këtë gjë e bëri të qartë edhe gjatë vizitës në Beograd.
“Të dy palët që kanë nënshkruar marrëveshjen duhet t’i zbatojnë zotimet. Kam qenë i qartë edhe në Beograd se duhet të bëjnë pjesën e punës së tyre dhe po ashtu edhe në Prishtinë, nëse zotoheni për një marrëveshje, natyrisht se duhet ta përmbushni”.
Billström, në konferencën e përbashkët për media me ministren e Jashtme, Donika Gërvalla, tha se Serbia duhet të ndalojë fushatën kundër anëtarësimit të Kosovës në organizata ndërkombëtare dhe se Kosova duhet të formojë Asociacionin e Komunave me Shumicë Serbe.
“Kjo nënkupton që në rastin e Serbisë, natyrisht se duhet të riformulojnë nga pengesa e Kosovës që t’i bashkohet organizatave ndërkombëtare dhe kjo është shumë e qartë. Këshilli i Evropës është një shembull, por kjo është një pjesë e rëndësishme. Në anën tjetër, është mirë dhe duhet që të shohim Kosovën t’i përmbushë zotimet saja, pra që të krijohet asociacioni i komunave, ashtu siç është arritur në marrëveshje”, deklaroi ai.
