Përfaqësuesi Special i Bashkimit Evropian për dialogun Kosovë-Serbi, Miroslav Lajçak e ka përfunduar takimin me kryeministrin e vendit Albin Kurti, me ç’rast ka dhënë edhe një deklaratë për media, ku foli për disa çështje, me theks të veçantë për planin franko-gjerman, zgjedhjet në veri dhe braktisjen e institucioneve nga serbët.
Lajçak me bashkëpunëtorët e tij ka zhvilluar një takim me kryeministrin Albin Kurti.
Ai tha se tani duhet të investojnë kohën në diskutime dhe sipas tij, kjo është arsyeja pse ka ardhur në Kosovë.
Lajçak u deklarua se me Kurtin kanë diskutuar për disa çështje, me theks të veçantë për planin franko-gjerman, zgjedhjet në veri dhe braktisjen e institucioneve nga serbët.
Ai tha se duhet të gjendet një zgjidhje pasi një pjesë e serbëve braktisën institucionet, pasi që në veri nuk duan që të ketë vakum institucional.
Ndërsa ka potencuar se nuk duan as që zgjedhjet në veri të përdoren si pretekst për destabilizimin e situatës.
Emisari Miroslav Lajçak shtoi se tani duhet të rikthehen diskutimet për normalizim të marrëdhënieve dhe hapat e ardhshëm në proces duhet të jenë më shpejtë.
Ai tha se plani franko-gjerman është pranuar si bazë e mirë diskutimi nga të dyja palët, si Kosova ashtu edhe Serbia.
“Procesi i normalizimit do të fillojë brenda javësh dhe kjo varet dhe është në duart e të dyjave palëve që të diskutojnë për të arritur marrëveshje. Nuk jam ithtar për që të jap afate se kur do të bëhet saktë kjo, por mund të them se në mars mund të deklarohem se ku jemi”, ka thënë mes tjerash Lajçak.
Lajçak dje ka qëndruar në Beograd, ku është takuar me presidentin e Serbisë, Aleksandar Vuçiq.
Me presidentin serb, Lajçak ka thënë se ka diskutuar për kthimin e serbëve të Kosovës në institucionet e Kosovës, udhërrëfyesin për energjinë si dhe të pagjeturit./KosovaNews
