Zëvendësministri i Punëve të Jashtme dhe Diasporës, Kreshnik Ahmeti e ka takuar të martën ambasadorin jo rezident të Irlandës për Republikën e Kosovës, Ronan Gargan, me të cilin ka diskutuar mes tjerash për anëtarësimin e Kosovës në Këshillin e Evropës.
Me këtë rast, zëvendësministri Ahmeti dhe ambasadori Gargan, diskutuan për thellimin e bashkëpunimit në mes të dyja vendeve në fushat e ndryshme, si të ekonomisë, sigurisë e kulturës.
Ahmeti tha se e njoftoi ambasadorin për aplikimin e Republikës së Kosovës për anëtarësim në Këshillin e Evropës, duke theksuar se anëtarësimi sa më i shpejtë do të kishte efekte jashtëzakonisht të mira për të gjitha komunitetet që jetojnë në Republikën e Kosovës.
Në këtë rast, zëvendësministri Ahmeti e ka falënderuar ambasadorin Gargan për mbështetjen që Irlanda i ka dhënë dhe vazhdon t’i jep Kosovës për anëtarësim në organizata ndërkombëtare dhe zhvillim të brendshëm të vendit./KosovaNews/
