Kreu i Lidhjes Demokratike të Kosovës, Lumir Abdixhiku e ka kritikuar kryeministrin e vendit, Albin Kurti edhe për rastin e vrasjes së gruas shtatzënë që ndodhi dje në oborrin e QKUK-së.
Sipas Abdixhikut, kryeministri po flet si analist e si opozitar dhe se ende nuk po e kupton që është udhëheqës i shtetit.
Nëse do shërbime më të mira spitalore dhe siguri brenda spitaleve tona, Abdixhiku thotë se Kurti të mos presë mbi 100 ditë për të vënë një ministër të shëndetësisë, respektivisht të tretin në më pak se dy vite qeveri.
“Po të donte rend e ligj, nuk do ta linte shtetin pa Kryeprokuror tash e një vit e nuk do t’ia zbriste pagat gjithë sistemit të drejtësisë, për të shkaktuar kaos aty. Një sistem i tërë drejtësie është në greve; mbi 500 lëndë në ditë shtyhen si pasojë e kësaj përplasjeje të panevojshme. Nëse do përgjegjësi, le të merret me ministrin e Brendshëm të tij dhe gjithë zinxhirin komandues, të cilin vetë e ka caktuar ai – nga Drejtori i Policisë e poshtë. Një grua shtatzënë kishte urdhër mbrojtje. Shteti i udhëhequr nga ai, ka rënë në çdo drejtim. Përgjegjësi kërko Kryeministër! Merr masa, vepro. Për atë punë je aty:, ka shkruar Abdixhiku në reagimin e tij./KosovaNews
