Policia e Kosovës ka publikuar fotografinë e të dyshuarit për përfshirje në vrasjen në “Bon Vivant” që ndodhi ditë më parë në Prishtinë.
Policia e Kosovës, mbështetur në urdhëresën e nxjerrë nga Prokuroria Themelore – Departamenti për Krime të Rënda, ka paraqitur para publikut fotografinë e të dyshuarit të shpallur në kërkim, i dyshuar për implikim në veprat penale;
– “Vrasja e Rëndë në Tentativë” nga Neni 173, lidhur me nenin 28, të KPK-së,
– “Shkaktim i rrezikut të përgjithshëm” nga Neni 356 të KPK-së,
– “Përdorim i armës apo mjetit të rrezikshëm” nga Neni 367 të KPK-së, si dhe
– “Mbajtja në pronësi kontroll ose posedim të pa autorizuar të armëve” nga Neni 366 të KPK-së.
Në njoftimin e Policisë thuhet se me qëllim të zbatimit efikas të procedurës, kërkojmë nga publiku i gjerë kontributin qytetar që me informacionet e tyre të ndihmojnë lokalizimin e vendndodhjes së të dyshuarve të shpallur në kërkim.
“Ne vlerësojmë lartë bashkëpunimin me komunitetin për një shoqëri pa krim, andaj presim që informacionet tuaja t’i kontribuojnë arrestimit sa më të shpejtë të tyre”, thuhet në njoftim.
