Veteranët e Ushtrisë Çlirimtare të Kosovës po vazhdojnë protestën e tyre në oborrin e Kuvendit të Kosovës, teksa sërish po tentojnë të hyjnë me forcë brenda objektit të Kuvendit.
Tashmë para dyerve të këtij institucioni ka dalë Njësia Speciale e Policisë së Kosovës, e cila ka përdorur sprej në drejtim të protestuesve, për të ndaluar këta të fundit që të futen në objekt.
Veteranët e Ushtrisë Çlirimtare të Kosovës me fillimin e protestës së sotme kanë hyrë me forcë në oborrin e Kuvendit të Kosovës, me ç’rast kanë gjuajtur gjësende në derën e institucionit.
Si pasojë e shtyrjeve dhe gjuajtjeve me gjësende një pjesëtar i Policisë së Kosovës është lënduar gjatë protestës.
Pamjet e bëra nga KosovaNews tregojnë policin e gjakosur, i cili shoqërohet nga kolegët për t’u larguar nga vendi i ngjarjes.
Kjo situatë e rënduar ka ndikuar që njësive policore të cilat po tentojnë të mbajnë rendin në oborrin e Kuvendit, t’u dalë në ndihmë edhe Njësia Speciale.
Pjesëtarët e kësaj njësie tashmë janë vendosur dhe po mundohet në mbajnë rendin dhe të mbrojnë institucionin më të lartë legjislativ të Kosovës.
